Gwasanaethau masnachol

Mae gan y Gofrestrfa Tir stôr unigryw o sgiliau a data y mae ystod gynyddol o gwsmeriaid yn barod i dalu amdanynt. Sefydlwyd Tîm Gwasanaethau Masnachol i ateb yr anghenion busnes hynny.

Mae'r tîm sy'n tyfu yn gweithio ym Mhenbedw, Coventry a Llundain ac ar ddiwedd Mawrth 2007 roedd 32 aelod o'r tîm. Mae'r gwerthiannau a gynhyrchir ganddynt wedi cynyddu o £0.6 miliwn yn y 12 mis i Fawrth 2006 i £1.8 miliwn yn yr un cyfnod hyd at Fawrth 2007.

Mae tri phrif faes busnes masnachol:

gwasanaethau data (gan gynnwys gwybodaeth prisiau eiddo)
gwasanaethau ymgynghori a chyngor
datblygu cofrestri cysylltiedig ag eiddo ar ran sefydliadau eraill.

Un o'r gwasanaethau newydd yw Golwg ar Eiddo, lle mae'r Gofrestrfa Tir yn codi tâl am fonitro perchnogaeth eiddo arbennig neu bortffolio o eiddo. Mae'n apelio at ddatblygwyr sy'n cynllunio prif brosiectau adeiladu, awdurdodau lleol, cwmnïau morgeisi, gwerthwyr tai ac eraill.

Mae datblygu gwasanaethau masnachol yn cynnig sawl mantais i gwsmeriaid ac i'r Gofrestrfa Tir. Mae'r manteision i ni yn cynnwys y gallu i ddefnyddio'r elw i gyllido anghenion buddsoddi yn y dyfodol a gwella ansawdd gwasanaeth yn ogystal â datblygu sgiliau newydd ein staff. O ran ein cwsmeriaid, mae'r Gofrestrfa Tir yn defnyddio ei sgiliau a'i hadnoddau i gynnig budd i'r gymuned ehangach.