Perfformiad, cynnydd tuag at amcanion strategol a strategaeth y dyfodol

AMCAN STRATEGOL 2: Cyflwyno deddfwriaeth eilaidd well ar gofrestru tir yn raddol o 2003

Ym mis Medi 2004, cyhoeddwyd dogfen ymgynghori o’r enw ‘Cyflwyno Gwybodaeth Benodedig mewn Prydesi Cofrestradwy’ gennym, a oedd yn holi barn ar ffyrdd amgen o gyflwyno gwybodaeth am bartďon, eiddo ac amodau mewn prydlesi cofrestradwy. Ymgynghorwyd â budd-ddeiliaid gan gynnwys trawsgludwyr, rhoddwyr benthyg, sefydliadau ariannol, syrfewyr, gwerthwyr tai ac yswirwyr. Gan ystyried y 198 o ymatebion a gawsom, aethom ati i ddiwygio’r cynigion, gan gyfyngu’r wybodaeth ragnodedig i’r wybodaeth honno sy’n gwbl hanfodol ar gyfer cofrestru. Ar ôl trafodaethau pellach gyda Chymdeithas y Cyfreithwyr ac adolygiad mewnol pellach, rydym yn gobeithio cyflwyno ein cynigion i Bwyllgor Rheolu Cofrestru Tir ym Mehefin 2005.

Daeth Rhan 1 Deddf  Cydradd-ddaliad a Diwygio Prydlesoedd 2002 i rym ar 27 Medi 2004. Dyma oedd ffrwyth llafur pedair blynedd o waith caled gan dimau o’r Gofrestrfa Tir a’r Adran Materion Cyfansoddiadol.

Mae cydradd-ddaliad yn ddewis amgen i berchnogaeth lesddaliad hir, ac mae’r un mor berthnasol i eiddo preswyl ac eiddo masnachol fel ei gilydd, a bydd yn gymwys i dir rhydd-ddaliol cofrestredig yn unig. Bydd perchnogion eiddo yn berchen ar rydd-ddaliad eu heiddo unigol a bydd ganddynt fudd mewn cymdeithas a fydd yn berchen ar rannau cyffredin yr adeilad neu ddatblygiad ac yn eu rheoli. Bydd pob cydradd-ddaliad yn cael ei gofrestru yn y Gofrestrfa Tir. Rydym wedi cynhyrchu canllawiau helaeth ar gyfer trawsgludwyr ar yr agweddau cofrestru ar y system newydd.