Cyfarwyddyd i gyfunddaliad Pam y cafodd ei gyflwyno

Pam y cafodd cyfunddaliad ei gyflwyno

Yn hanesyddol, eiddo prydlesol oedd y rhan fwyaf o fflatiau yng Nghymru a Lloegr. Mae hyn yn rhannol oherwydd na fu'n bosibl gorfodi cyfamodau cadarnhaol, fel rhai i sicrhau cynhaliaeth i rannau o adeiladau, heblaw am dir prydlesol. Mae cyfunddaliad yn goresgyn y broblem hon ac yn cynnig dewis amgen i greu prydles a chael landlord.

Mae cyfunddaliad yn wahanol i berchnogaeth lesddaliad hir oherwydd:

• mae'r dogfennau wedi eu safoni
• mae'r gymdeithas cymuned cyfunddaliad (sy'n 'eiddo' i'r uned-ddalwyr) yn rheoli ei busnes ei hun heb gyfeirio at landlord trydydd parti
• mae gweithdrefnau datrys anghydfod yn cynnig dewis amgen i broses y llysoedd.

Cynhwysir defnydd a threfniadau cynnal a chadw'r unedau a hawliau a dyletswyddau'r uned-ddalwyr a'r gymdeithas yn y datganiad cymuned cyfunddaliad, sef dogfen allweddol y gymuned cyfunddaliad gyfan.

Un o fanteision eraill cyfunddaliad yw bod y tir yn cadw'i werth oherwydd ei fod yn rhydd-ddaliad, tra bod gwerth tir prydlesol yn gostwng wrth i gyfnod y brydles ddod i ben. Gall y gwerth hwn sy'n gostwng effeithio ar allu lesddeiliaid i gael morgais.

Mae'r dudalen nesaf yn trafod y dogfennau sy'n hanfodol er mwyn creu a rheoli cyfunddaliad.