| Cwestiynau sy'n ymwneud â chadarnhau hunaniaeth
Pryd bydd rhaid i mi gadarnhau hunaniaeth wrth gyflwyno cais?
Newidiwyd ffurflenni AP1, DS2 ac FR1 gan Reolau Cofrestru Tir (Newidiad) 2008 i gynnwys paneli 'cadarnhau hunaniaeth'. Rhaid llenwi'r paneli hyn (a chyflwyno tystiolaeth o hunaniaeth pan fo'n ofynnol) pan fyddwch yn gwneud cais i gofrestru un o'r trafodion canlynol ar neu ar ôl 10 Tachwedd 2008 ac mae gwir werth y tir yn fwy na £5,000.
- Trosglwyddiadau (am werth neu beidio).
- Trosglwyddiadau a gweithredoedd sy'n ymwneud â phenodiad ac ymddeoliad ymddiriedolwyr.
- Prydlesi (am werth neu beidio).
- Arwystlon i'w cofrestru.
- Ildio prydlesi.
- Gollyngiad ar ffurflen bapur DS1.
- Rhyddhad ar ffurflen DS3.
- Ceisiadau am gofrestriad cyntaf gorfodol lle bo'r weithred sy'n peri cofrestriad yn ddyddiedig ar neu ar ôl 10 Tachwedd.
Yn ogystal, rhaid llenwi'r paneli gyda'r rhan fwyaf o geisiadau am gofrestriad cyntaf lle collwyd neu lle dinistriwyd y gweithredoedd teitl.
Os yw unrhyw barti heb gynrychiolaeth, rhaid i chi naill ai gadarnhau eich bod yn fodlon ynghylch ei hunaniaeth neu amgáu tystiolaeth yn ffurflen ID1 neu ID2.
Beth fydd yn digwydd os na fyddaf yn darparu'r wybodaeth ofynnol?
Bydd y Gofrestrfa Tir yn gwrthod pob cais lle nad yw'r paneli wedi'u llenwi neu os nad yw tystiolaeth o hunaniaeth yn cael ei chyflwyno lle bo'n ofynnol.
Pam cyflwyno'r newidiadau hyn?
Rydym wedi cyflwyno'r newidiadau i atgoffa pobl bod y Gofrestrfa Tir, wrth gofrestru trosglwyddiadau, gollyngiadau, arwystlon, prydlesi a gwarediadau tir eraill, yn dibynnu ar y camau mae trawsgludwyr yn eu cymryd, lle bo'n briodol, i gadarnhau hunaniaeth eu cleientiaid, a bod y gwiriadau hyn yn lleihau'r perygl o dwyll eiddo.
Nid ydym yn ceisio trosglwyddo'r cyfrifoldeb am dwyll hunaniaeth neu indemniad i'r trawsgludwr. Rydym eisoes yn dibynnu ar drawsgludwyr i gymryd gofal priodol i wirio hunaniaeth; bwriad y newidiadau arfaethedig yw eu hatgoffau o hyn a bod uniondeb y system dan fygythiad gan dwyll hunaniaeth.
Pa opsiwn ym mhanel 12 (AP1) y dylai rhoddwr benthyg ar y stryd fawr ei ddefnyddio?
Os yw cais yn cael ei gyflwyno'n uniongyrchol gan fanc, byddwn yn cymryd yn ganiataol ei fod wedi cael ei gyflwyno gan drawsgludwr. Dylai'r banc lenwi'r blwch cyntaf, hynny yw, nodi ei fod yn 'drawsgludwr at ddiben llenwi'r ffurflen'. Os nad yw'n fodlon gwneud hynny, bydd rhaid iddo lenwi'r ail flwch ac yna llenwi panel 14 (AP1).
Trawsgludwr ydw i sy'n cyflwyno ceisiadau ar ran rhoddwr benthyg ar y stryd fawr. Oes angen ffurflenni ID ar gyfer y rhoddwr benthyg?
Man gan lawer o roddwyr benthyg drawsgludwyr ar eu staff ac os ydych yn delio â thrawsgludwr sy'n aelod o staff rhoddwr benthyg, dylech ychwanegu eu manylion at ran (1) panel 13 ffurflen AP1.
Os nad yw'r rhoddwr benthyg yn gweithredu trwy ei drawsgludwr ei hun, neu os nad yw'n cael ei gynrychioli gan drawsgludwr annibynnol, dylech ofyn i'ch hun: "Ydw i'n hyderus fy mod mewn gwirionedd yn delio â'r rhoddwr benthyg?" Os ydych, dylech allu llenwi'r opsiwn cyntaf ym mhanel 13(2), hynny yw, eich bod yn fodlon y cymerwyd camau digonol i wirio hunaniaeth y rhoddwr benthyg. Os nad ydych yn fodlon llenwi'r opsiwn hwn, dylech ofyn i'r rhoddwr benthyg ddarparu tystiolaeth o hunaniaeth yn ffurflen ID2.
Mae panel 13(2) yn ffurflen AP1 yn cyfeirio at drawsgludwr yn cymryd 'camau digonol' i wirio hunaniaeth partïon heb gynrychiolaeth. A wnewch chi gadarnhau beth sy'n cyfrif fel 'camau digonol'. Mae un o'n cleientiaid yn fanc ar y stryd fawr sy'n cynnal ei wiriadau gwyngalchu arian ei hun. Os ydyn ni'n fodlon ei fod wedi gwneud ei wiriadau gwyngalchu arian, oes modd i ni ddibynnu ar hyn a chadarnhau bod 'camau digonol' wedi cael eu cymryd?
Ni allwn roi cyngor am hyn. Cyfrifoldeb y banc yw bodloni ei hun ynghylch hunaniaeth ei gwsmer. Os yw'n fodlon bod ei wiriadau gwyngalchu arian yn ddigonol i'r diben hwn, dylai ystyried llenwi'r opsiwn cyntaf ym mhanel 13(2).
Mae'r ail ddatganiad ym mhanel 13(2) AP1 yn rhoi cyfle i drawsgludwr amgáu tystiolaeth o hunaniaeth. A wnewch chi gadarnhau beth sy'n cyfrif fel tystiolaeth o hunaniaeth at ddiben y panel hwn? Er enghraifft, a fyddai copi ardystiedig o basbort yn dderbyniol, neu a fyddai disgwyl i ni gadarnhau mai'r un person yw deiliad y pasbort â'r sawl sy'n cyflawni'r trosglwyddiad, prydles neu arwystl?
Rhaid i'r dystiolaeth fod yn ffurflen ID1 neu ID2 bob amser.
Dylid defnyddio panel 14 lle bo'r cais yn cael ei anfon at y Gofrestrfa Tir gan rywun nad yw'n drawsgludwr. Mae panel 14(1) yn gofyn am fanylion y trawsgludwr sy'n gweithredu. Gan fod y cais yn cael ei anfon gan rywun nad yw'n drawsgludwr, at ba drawsgludwr mae hyn yn cyfeirio?
Gall hyn fod yn berthnasol, er enghraifft, mewn sefyllfa lle mae prynwr heb gynrychiolaeth gyfreithiol yn cyflwyno cais ond mae cynrychiolaeth gan y gwerthwr. Yn y sefyllfa hon, trawsgludwr y gwerthwr ddylai gael ei enwi ym mhanel 14(1).
Sut mae cael rhagor o wybodaeth am gadarnhau hunaniaeth?
Mae gennym ddau gyfarwyddyd sy'n esbonio pryd a sut y dylid llenwi'r paneli. Os ydych yn drawsgludwr, gweler Cyfarwyddyd Ymarfer 67 - Tystiolaeth o hunaniaeth - trawsgludwyr; Os nad ydych yn drawsgludwr, gweler Cyfarwyddyd Cyhoeddus 20 - Tystiolaeth o hunaniaeth - i bobl nad ydynt yn drawsgludwyr.
|
