Cydradd-ddaliad
Gweithdrefn ar gyfer creu cydradd-ddaliad
Gwneir cais i'r Gofrestrfa Tir gan un ai ddatblygwr datblygiad newydd arfaethedig, grŵp o lesddeiliaid cyfredol sydd am newid eu heiddo i statws gydradd-ddaliol, (mae'r Ddeddf yn gwneud darpariaeth sy'n galluogi troi datblygiad lesddaliad yn gydradd-ddaliad, ond dim ond os yw 100% o'r holl bartïon perthnasol sydd â budd yn cytuno) neu berchnogion eiddo rhydd-ddaliol cyfredol sydd â chyfleusterau cymunedol ac sydd hefyd am newid i gydradd-ddaliad.
Rhaid cyflwyno ceisiadau ar ffurflen CM1. Os nad yw’r tir wedi ei gofrestru eisoes gellir gwneud cais am gofrestriad cyntaf ar yr un pryd gan ddefnydddio ffurflen FR1.
Rhaid amgáu'r dogfennau canlynol gyda'r cais am gydradd-ddaliad:
- copïau ardystiedig o dystysgrif corffori a memorandwm ac erthyglau cyweithio’r gymdeithas;
- y caniatadau sy’n angenrheidiol yn ôl y Ddeddf a’r Rheoliadau; a
- tystysgrif a ddarperir gan gyfarwyddwyr y gymdeithas cydradd-ddaliad yn ardystio fel a ganlyn: bod y memorandwm a’r erthyglau yn cydymffurfio â’r rheoliadau; bod y datganiad cymuned cydradd-ddaliad a gyflwynir gyda’r cais yn cwrdd â gofynion y Ddeddf; nad yw’r tir dan sylw yn dir nad yw’n gallu cael ei gyfrif yn dir gydradd-ddaliol; nad yw’r gymdeithas cydradd-ddaliad wedi masnachu ac nad yw wedi mynd i atebolrwydd sydd heb gael ei ryddhau.
- Y ffi sy’n ddyledus yn unol â Gorchymyn Ffi (Newidiad) Cofrestru Tir 2004.
Yn ogystal â’r dogfennau hyn, rhaid amgáu hefyd gyda’r cais datganiad statudol a wnaethpwyd gan y ceisydd sy’n:
- rhestru’r caniatadau, neu’r gorchmynion llys sy’n esgusodi rhag gael caniatâd, a roddwyd;
- cadarnhau nad oes cyfyngiad ar y gofrestr sy’n gwarchod budd y mae angen gael caniatâd y daliwr yn ei gylch, neu os oes cyfyngiad sy’n gwarchod budd o’r fath bod y caniatâd priodol wedi ei gael;
- cadarnhau nad oes angen cael unrhyw ganiatâd arall yn ôl y Ddeddf a’r Rheolau;
- cadarnhau nad oes unrhyw ganiatâd sydd wedi cael ei dynnu yn ôl; a
- cadarnhau os yw caniatâd yn ddarostyngedig i amodau, bod yr holl amodau wedi cael eu bodloni.
