Treth Tir Toll Stamp (SDLT)

Newidiadau sy'n effeithio ar Dreth Tir Toll Stamp gan gynnwys diddymu'r SDLT60

Cyflwynodd Cyllideb 2008 nifer o newidiadau gyda'r amcan o leihau'r baich gweinyddol sy'n gysylltiedig â Threth Tir Toll Stamp (SDLT). Mae'r trothwy lle mae'n rhaid hysbysu trafodiad wedi ei symleiddio a diddymwyd yr hunan-dystysgrif SDLT60 i bob diben.

Nid oes angen tystiolaeth SDLT dan yr amgylchiadau canlynol lle cwblhawyd y trafodiad ar neu ar ôl 12 Mawrth 2008:

• Caffaeliad (heblaw grant, aseiniad neu ildiad prydles) lle bo'r gydnabyddiaeth drethadwy ar gyfer y caffaeliad hwnnw (ynghyd ag unrhyw drafodiad cysylltiedig) yn llai na £40,000. Mae hyn yn cynnwys trosglwyddiadau o dir rhydd-ddaliol, gweithredoedd rhodd a gweithredoedd grant hawddfraint. Mae hyn yn cynnwys nodi buddion yn ogystal â'u cofrestru'n safonol.

• Grant o brydles am gyfnod o saith mlynedd neu fwy lle mae'r canlynol yn wir:

  • mae'r premiwm yn llai na £40,000 ac

  • mae'r rhent blynyddol yn llai na £1,000.  

• Aseinio neu ildio prydles dan yr amgylchiadau canlynol:

  • rhoddwyd y brydles yn wreiddiol am gyfnod o saith mlynedd neu fwy; ac

  • mae'r gydnabyddiaeth am yr aseiniad neu'r ildiad, heblaw unrhyw rent, yn llai na £40,000; ac

  • mae'r rhent yn llai na £1,000.

• Mae prydles yn cael ei rhoi, ei haseinio neu ei hildio am gyfnod o lai na saith mlynedd lle nad yw'r premiwm yn uwch na'r trothwy cyfradd o ddim, h.y. £125,000 yn achos eiddo preswyl a £150,000 yn achos eiddo masnachol.

• Nid oes angen tystiolaeth SDLT chwaith yn achos trafodion a eithriwyd yn unol ag Atodlen 3 Deddf Cyllid 2003.

Mae angen SDLT5, gan gynnwys prawf o dderbyn (SDLT5 electronig) a thystysgrifau gwerthwr trydydd parti, ar gyfer pob trafodiad arall, nad yw'n cael ei ystyried yn drafodiad heb fod yn brif drafodiad.

Buddion heb fod yn brif fuddion

Nid oes angen hysbysu caffaeliad budd trethadwy heblaw prif fudd mewn tir oni bai fod cydnabyddiaeth drethadwy lle bo SDLT yn daladwy yn ôl cyfradd o 1 y cant neu fwy. Er enghraifft, mae caffael hawddfraint yn gaffaeliad budd trethadwy nad yw'n brif fudd mewn tir. Felly, pe byddai'r gydnabyddiaeth drethadwy yn ôl cyfradd o 1 y cant neu fwy, byddai rhaid hysbysu'r trafodiad. Nid oes angen tystiolaeth SDLT os yw'r gydnabyddiaeth rhwng £40,000 a £125,000 yn achos tir preswyl a rhwng £40,000 a £150,000 yn achos tir masnachol.

Caiff unrhyw gais sydd wedi cael ei roi o'r neilltu gan y Gofrestrfa Tir i aros am SDLT60 ei gwblhau heb ystyried pryd y cwblhawyd y trafodiad, yn amodol ar dderbyn atebion i unrhyw ymholiadau eraill.

Mae'r Gofrestrfa Tir yn diweddaru ei hymarfer mewnol ac allanol a chaiff y Cyfarwyddiadau Ymarfer perthnasol eu diweddaru mor fuan â phosibl.

Mae manylion pellach y newidiadau yn y Gyllideb sy'n effeithio ar SDLT i'w gweld ar wefan Cyllid a Thollau EM.

Trefniadau Treth Tir Toll Stamp newydd ar gyfer trafodion sy’n effeithio ar fwy na 100 eiddo

Ar 1 Chwefror 2008 cyflwynodd Cyllid a Thollau EM drefn newydd i alluogi defnyddwyr Trethi Stamp Ar-lein a phecynnau ar-lein eraill i gyflwyno ceisiadau SDLT ar gyfer trafodion sy’n effeithio ar fwy na 100 eiddo.

Mae staff y Gofrestrfa Tir sy’n ymdrin â’r fath geisiadau wedi cael eu hysbysu o’r drefn newydd ac wedi cael cyfarwyddiadau i wneud y gwiriadau angenrheidiol ar yr ‘rhestr eiddo’ newydd a’r dderbynneb cyflwyno. Yn bennaf, byddant yn chwilio am y cyfeirnod a ddarparwyd gan Gyllid a Thollau EM a gwirio bod yr eiddo a restrir yn cyfateb â’r rhai sy’n destun y cais i’r Gofrestrfa Tir.

Mae rhagor o wybodaeth am y trefniadau newydd i’w gweld ar wefan Cyllid a Thollau EM.

Cyngor cyffredinol ar Dreth Tir Toll Stamp

Mae cyngor ar gael o Gyllid a Thollau EM ac o’r Gofrestrfa Tir.

Mae Bwletin Ymarfer 8 y Gofrestrfa Tir  yn amlinellu gofynion y Gofrestrfa Tir yn llawn. Yn gryno

• Bydd rhaid cyflwyno Dychweleb Trafodiad Tir i Gyllid a Thollau EM.
• Wedyn, bydd Cyllid a Thollau EM yn darparu tystysgrif y mae'n rhaid ei chyflwyno i'r Gofrestrfa Tir cyn y gellir cofrestru'r trafodiad (Deddf Cyllid 2003 adran 79).

Ni fydd yn rhaid talu Treth Tir Toll Stamp ar rai trafodion naill ai gan eu bod yn is na'r trothwy neu gan fod y trafodiad yn gymwys i gael rhyddhad. Bydd angen hysbysu Cyllid a Thollau EM am rai o'r trafodion hyn o hyd. Sylwch na fydd y Gofrestrfa Tir yn gallu eich helpu i benderfynu a oes angen dychweleb trafodiad tir ar eich trafodiad neu a yw'n esempt.

Mae gwefan Cyllid a Thollau EM yn cynnwys manylion llawn am gwblhau a llofnodi dychweleb trafodiad tir yn ogystal â chylchlythyron ymarferyddion a chylchlythyron technegol a Chwestiynau a Ofynnir yn Aml.

Trethi Stamp Ar-lein

Gwasanaeth cyflym ac effeithlon yw Trethi Stamp Ar-lein sy'n cynnig cyfrwng diogel i ymarferyddion weld data a chyflwyno Dychweleb Trafodiad Tir ar-lein. Mae'n fwy cyfleus na dulliau eraill am fod modd i chi gyflwyno dychweleb ar unrhyw amser ac, yn y rhan fwyaf o achosion, mae'r atebolrwydd treth yn cael ei gyfrifo ar eich rhan.

Ar ôl cyflwyno dychweleb yn llwyddiannus i Gyllid a Thollau EM, gall cwsmeriaid ar-lein argraffu'r dderbynneb a'i hanfon i'r Gofrestrfa Tir, ynghyd â'r dogfennau angenrheidiol ar gyfer cofrestru.